Справка
Хәйерле көн! Ошо һөйләмдә хата бармы? Әсәй, һин өйҙәме ул тейем.
Һөйләмдең дөрөҫ яҙылышы: Әсәй, һин өйҙәме ул, тим. (140-сы һорауҙы ҡарағыҙ).
Ерле-юҡҡа асыуланды. Был һөйләм дөрөҫ яҙылғанмы?
Дөрөҫ яҙылышы: Ерле юҡҡа асыуланды.
Һауыт һаба тип яҙылған бер текст осраны. Был һүҙ һыҙыҡса аша яҙылмай ине мени?
Дөрөҫ, һауыт-һаба һыҙыҡса аша яҙыла.
Был иҫке сүместе беҙ әлелә тотынабыҙ. Һөйләм дөрөҫмө?
Дөрөҫ яҙылышы: Был иҫке сүместе беҙ әле лә тотонабыҙ.
Йәиһә һүҙенең дөрөҫ яҙылышы нисек була икән?
Орфография ҡағиҙәләренә ярашлы, икән, иһә, ине ярҙамлыҡ ҡылымдары айырым яҙыла: бармы икән, бар икән; ул иһә, яҡшылыҡ иһә, йә иһә, ала ине, килер ине.
Ике һүҙҙән ҡайһыһы дөрөҫ: әкренәйтеп ме, аҡрынайтып мы?
Орфография һүҙлегендә (2002) әкренәйтеп формаһы теркәлгән.
Ярҙам итегеҙ әле. Ҡайһы һүҙ дөрөҫ яҙылған – шыбырлау – шыбырҙау?
Дөрөҫ яҙылышы: шыбырлау.