Справка
Ҡайһы яҙылыш дөрөҫ була икән: иҫ китәреү, иҫ китереү?
Дөрөҫ яҙылышы: иҫ китәреү.
Бәлким тип яҙырға яраймы?
Әҙәби телдә бәлки формаһы ҡулланыла. Һүҙҙең аҙағында м хәрефе яҙылмай.
Ошо һүҙ нисек яҙыла ул: тыңғыһыҙ, тынғыһыҙ?
Дөрөҫ яҙылышы: тынғыһыҙ. Һүҙ тын- тамырынан яһалған.
Хәйерле көн! Тел белгестәренә һорауым бар. Матбуғатта, социаль селтәрҙәрҙә кемуҙарҙан, кем уҙарҙан тип ике төрлө яҙалар. Ҡайһыһы дөрөҫ була?
Дөрөҫ яҙылышы: кем уҙарҙан.
Аҫрауға алыу тигәндә ҫ хәрефенән һуң ы өнө ишетелә. Ниңә уны яҙмайбыҙ?
Дөрөҫ, аҫрау һүҙендә р алдынан ы ишетелгәндәй була, тик ул яҙылмай. Орфография ҡағиҙәһенә ярашлы, тамыр һүҙ эсендәге асыҡ ишетелмәй торған баҫымһыҙ о /ө, ы /е һуҙынҡылары р алдына тура килгәндә яҙылмай.
Перепись һүҙенә ялғау ҡушҡанда ь хәрефе яҙыламы?
Һүҙ аҙағындағы ь хәрефе һүҙгә ялғауҙар ҡушылғанда төшөрөп ҡалдырыла: переписта ҡатнашыу.
Алдынғы һүҙендә ниндәй хәреф яҙыла: н // ң хәрефе?
Был һүҙ н менән яҙыла, сөнки тамыры йәки нигеҙе н өнөнә тамамланған һүҙгә -ге / -ғы, -ке / -ҡы һүҙ яһаусы ялғауҙар ҡушылғанда тамырҙағы йәки нигеҙҙәге н һаҡлана: алдын – алдынғы.
Двигатель һүҙенә ниндәй ялғау ҡушып яҙырға?
Һүҙҙең дөрөҫ яҙылышы: двигателдәр. Аҙағы —ль менән килгән һүҙгә нәҙек ялғау ҡушыла.
Ведомосте тултырыу тип яҙыламы?
Дөрөҫ яҙылышы: ведомосты тултырыу. Ҡалын ялғау ҡушыла.
Гастролгә сыҡтылар. Әллә гастролга сыҡтылар дөрөҫмө?
Дөрөҫ яҙылышы: гастролгә сыҡтылар.