Справка
Ниндәй вариант дөрөҫ: йөрьәт, йөрйәт? Матбуғатта төрлөсә яҙалар.
Дөрөҫ яҙылышы: йөрьәт.
Социаль селтәрҙәрҙә төйәп, төйәлеп тип яҙғандарын осратҡаным бар. Дөрөҫ яҙғанда тейәп, тейәлеп булмаймы ни ул?
Эйе, дөрөҫ яҙылышы: тейәп, тейәлеп.
Һеҙҙән ярҙам һорайым. Нисек яҙалар икән: баҡтиһәң, баҡтиниһәң.
Әҙәби телдә баҡһаң, баҡтиһәң формалары ҡулланыла.
Атаһы, атайы, әсәһе, әсәйе тип төрлөсә яҙғандарын осратам. Мин дөрөҫ яҙылған формаһын белергә теләйем.
Эйәлектең 3-сө зат берлек формаһы -һы/-һе; -һо/-һө; -ы/-е /-о/-ө ялғауҙары менән яһала: атаһы, әсәһе.
Камзол һүҙе башҡортса нисек яҙылырға тейеш: камзол, камзул?
Дөрөҫ яҙылышы: камзул.
Ҡорбан салыу, ҡорбан һалыу. Ҡайһы вариант дөрөҫ була? Өйрәтеп ебәрегеҙ әле.
Дөрөҫ яҙылышы: ҡорбан салыу.
Бер-нисә һүҙен яҙғанда һыҙыҡса ҡуйырға кәрәкме?
Һыҙыҡса ҡуйылмай, дөрөҫ яҙылышы: бер нисә.
Суйын тип тә, сөгөн тип тә яҙалар. Әҙәби телдә нисек яҙырға тейешбеҙ?
Әҙәби телдә суйын варианты ҡулланыла.