Справка
Пароль һүҙенә ниндәй ялғау ҡушыла?
Нәҙек ялғау ҡушыла, мәҫәлән: паролен, паролдең.
Һүҙ аҙағында һ тартынҡыһы килергә мөмкинме?
Башҡорт телендә һ тартынҡыһы һүҙ аҙағында килмәй. Ул тик үҙләштерелгән һүҙҙәрҙә генә булырға мөмкин: шаһ, падишаһ, гонаһ, геуаһ (фарсы теленән), илаһ (ғәрәп теленән) һ.б.
Отель һүҙенә ниндәй ялғау ҡушырға?
Ҡағиҙәгә ярашлы, аҙағы -ль, -нь менән килһә йәки ике тартынҡы менән бөтөп, һуңғыһы йомшаҡ булһа, нәҙек ялғау ҡушыла: отеле, отелгә. Башҡорт телендә был мәғәнәлә ҡунаҡхана тигән һүҙҙе ҡулланыу отошлораҡ.
Ҡатырҡа, ҡатырға, ҡатырҡы тип һөйләүселәр бар. Ҡайһыһын ҡулланырға?
Әҙәби телдә ҡатырға һүҙе нығынған.
Шахматта уйнайым, шахмат уйнайым. Ике төрлө яҙалар ошо миҫалды. Ҡайһыһы тел нормалары буйынса дөрөҫ тип иҫәпләнелә?
Дөрөҫ яҙылышы: шахмат уйнайым.
Телдә ҡуңыр, ҡуңғыр, ҡуңырт, ҡуңғырт тип йөрөтәләр. Ҡайһы варианты дөрөҫ?
Әҙәби телгә ҡуңыр һүҙе ингән.
Ҡыҫынҡы һүҙе нисек, н йәки ң хәрефе менән яҙыламы?
Был һүҙҙә —н- яҙыла, сөнки тамыры йәки нигеҙе —н өнөнә тамамланған һүҙгә –ге /–ғы, -ке /- ҡы һүҙ яһаусы ялғауҙар ҡушылғанда, тамырҙағы йәки ниегеҙҙәге —н һаҡлана.
Ишегалды тип яҙыу дөрөҫмө? Ишек алды була торғайны. Социаль селтәрҙәрҙә төрлөсә яҙалар.
Дөрөҫ яҙылышы: ишек алды.
Һөйләгәндә алъюҫыҡҡа, алъюһыҡҡа тип тә әйтәләр. Ҡайһыһы дөрөҫ?
Дөрөҫ яҙылышы: алъюҫыҡҡа.