Справка
Ошондай осраҡта нисек яҙыу дөрөҫ була икән?
“Атайсалым – Ватаным” төбәк-ара конференцияһы.
“Атайсалым – Ватаным” Төбәк-ара конференцияһы.
Дөрөҫ яҙылышы: “Атайсалым – Ватаным” төбәк-ара конференцияһы.
Рухи ҡиммәттәрҙе быуындан-быуынға еткереү тигәндә хата бармы?
Быуындан быуынға айырып яҙыла. 47-се һорауҙы ҡарағыҙ.
Еңел аҡыллыҡта ғәйепләй. Еңел аҡыллыҡ дөрөҫ буламы, еңел аҡыллылыҡмы?
Һүҙбәйләнеш еңел аҡыллы нигеҙендә барлыҡҡа килгән, уға исем яһаусы —лыҡ ялғауы ҡушылып, еңел аҡыллылыҡ һүҙе хасил була.
“Китап” нәшриәте Рәсәй Фәндәр академияһы тип яҙа. Шул дөрөҫмө?
Дөрөҫ яҙылышы: Рәсәй фәндәр академияһы.
Красногорск ҡалаһы тураһында Красногорскиҙа тип яҙҙылар. Красногорскта булырға тейеш түгелме ни?
Ҡағиҙәгә ярашлы, -ск менән бөткән ҡала исемдәренә ялғау ҡушҡанда -и- өҫтәп яҙыла: Омск – Омскиға, Минск – Минскиҙа, тимәк, Красногорскиҙа тип дөрөҫ яҙылған.
Гәзиттә кемдәкем тигән һүҙ яҙылған (кемдәкем тиҙерәк барып етә), ошолай яҙыла аламы был һүҙ?
Дөрөҫ яҙылышы: кем дә кем.
Ай күрҙе ҡояш алды тигән әйтемдә өтөр кәрәкме?
Һөйләм ике ябай һөйләмдән ойошҡан, өтөр ҡуйыла: Ай күрҙе, ҡояш алды.
Төньяҡ һүҙен төрлөсә яҙа башланылар. Йә ь, йә ъ күренә. Ике яҙылышты ла дөрөҫ тип ҡалдырып буламы?
Дөрөҫ яҙылышы: төньяҡ, башҡа вариант юҡ.
Бысраҡ һүҙен әйткәндә бик асыҡ итеп бысыраҡ тип ишетелә. Ниңә бында ы яҙылмай?
Орфография ҡағиҙәләренә ярашлы, тамыр һүҙ эсендәге асыҡ ишетелмәй торған баҫымһыҙ -о-/-ө-, -ы-/-е- һуҙынҡылары -р- алдына тура килгәндә яҙылмай: аңра, аҫрау, биҙрәү, бөҙрә, бөкрө, бысраҡ.