Справка
Һөйләшкәндә тасҡау йәки тасҡыу тип тә әйтәләр. Ҡайһы варианты дөрөҫ?
Әҙәби телдә тасҡау һүҙе ҡулланыла.
Сығынҡы һүҙе ниндәй хәреф, н йәки ң менән яҙыла?
Дөрөҫ яҙылышы: сығынҡы, -н өнөнә бөткән нигеҙҙән —ге / -ғы, -ке/ -ҡы ялғауҙары менән яһалған һүҙ булһа, -н менән яҙыла.
Эмаль һүҙенә ниндәй ялғау ҡушыла?
Дөрөҫ яҙылышы: эмалгә, эмалде. Аҙағы —ль, -нь менән килһә йәки ике тартынҡы менән бөтөп, һуңғыһы йомшаҡ булһа, нәҙек ялғау ҡушыла.
Халыҡ телендә һәҙәптә, һиҙәптә тейҙәр, әҙәби телгә ҡайһы варианты ингән?
Башҡорт әҙәби телендә һиҙәп һүҙе ҡулланыла.
Сәфәрғолов фамилияһына эйәлек килеш ялғауы ҡушылғанда, ҡайһы вариант дөрөҫ була: Сәфәрғоловтоң /Сәфәрғоловтың?
Рус телендәге -ов формаһы менән яһалған башҡорт фамилияларында килеш ялғауҙарында сингармонизм законы һаҡланмай; был осраҡта фамилия Сәфәрғоловтың рәүешендә яҙыла.
Өфөнөң Черниковка биҫтәһендәге Машиностроителей урамы Машина төҙөүселәр урамы, Машина эшләүселәр урамы (хатта бер заман Машина теҙеүселәр урамы ла) ла булып тәржемә ителә. Дөрөҫ варианты нисек икән?
Машина эшләүселәр урамы тип ҡулланыу дөрөҫөрәк һанала.
Как правильно написать по-башкирски фамилию Ильчикаев?
Обычно фамилия регистрируется как Илсекәев.
Иҫәнсурин фамилияһына ҡаты ялғауҙар ҡушыламы әллә нәҙек ялғауҙармы (Иҫәнсуринға, Иҫәнсурингә)?
Рус телендәге -ев, -ин формалары менән яһалған башҡорт фамилияларына, нигеҙе ҡалын булһа, ҡалын ялғау ҡушыла, тимәк, был фамилияның дөрөҫ яҙылышы: Иҫәнсуринға.
Ғәлиуллин фамилияһына ниндәй ялғау ҡушыла – Ғәлиуллинды, Ғәлиуллинде?
Рус телендәге -ев, -ин формалары менән яһалған башҡорт фамилияларына, нигеҙе ҡалын булһа, ҡалын ялғау ҡушыла, тимәк, был фамилияның дөрөҫ яҙылышы: Ғәлиуллинды.