Справка
Һаумыһығыҙ! Ағайының сәсе бөҙрә тип яҙыу дөрөҫ түгел бит?
Әҙәби телдә ағаһының формаһы нығынған.
Тойоуы һүҙе ниңә сингармонизм законына буйһонмай?
Ҡағиҙәгә ярашлы, беренсе ижектәрендә о йәки ө өндәре булған төп башҡорт һүҙҙәренең ҡалған ижектәрендә а, ә, у, ү, и өндәренең береһе килһә, уларҙың һуңғы ижектәрендә ы, е хәрефтәре яҙыла, шуның өсөн был һүҙ тойоуы тип яҙыла.
Яҡуттарҙа ырыу башлығын тойон тип атайҙар. Шуны нисек итеп дөрөҫ үҙгәртергә ул? Тойондың дөрөҫ буламы?
Беренсе ижектәрендә о йәки ө өндәре булған төрки сығанаҡлы һүҙҙәрҙең башҡа ижектәрендә а, ә, у, ү һәм и өндәренең береһе килмәһә, бөтә ижектәрендә лә о – ө яҙылышы һаҡлана, шуға күрә был һүҙ тойондоң итеп ҡулланыла.
Ошо һүҙҙең яҙылышын асыҡларға ярҙам итегеҙ, зинһар. Дүртаяҡлап йөрөү / дүрт аяҡлап йөрөү?
Һүҙ “Башҡорт теленең академик һүҙлеге”ндә (Өфө, 2012, 3-сө том, 457-се бит) дүрт аяҡлау – дүрт аяҡлап йөрөү формаһында теркәлгән.
Кәкре һүҙен әйткәндә бик асыҡ итеп кәкере тип ишетелә. Ниңә урталағы е яҙылмай?
Был һүҙҙең яҙылышы түбәндәге ҡағиҙәгә тап килә: тамыр һүҙ эсендәге асыҡ ишетелмәй торған баҫымһыҙ -о-/-ө-, -ы-/-е- һуҙынҡылары -р- алдына тура килгәндә яҙылмай: бысраҡ, кәкре.
Металлург һүҙенә төбәү килеш ялғауын нисек ҡушырға ул?
Төбәү килеш кемгә? һорауына яуап бирә, тимәк, -ҡа / -кә, -ға / -гә ялғауы ҡушылырға тейеш. Ҡағиҙәгә ярашлы, аҙағы ҡаты -к, -г менән бөткән сит телдәрҙән ингән һүҙҙәргә -к менән башланған ялғау ҡушыла: металлург – металлургка.
Һорау биргәндә, һорау киҫәксәһе һәр ваҡыт ҡушып яҙыламы?
Ҡағиҙәгә ярашлы, -мы / -ме, -мо / -мө һорау киҫәксәһе ҡушып яҙыла: эшләнеме, эшләнеңме, эшләнгәнме һ.б.
Тирә яҡ тигәндең төрлө яҙылышы осрағаны бар: һыҙыҡса аша, айырым. Дөрөҫө нисек икән?
Орфография һүҙлегендә һыҙыҡса аша яҙылыш бирелә: тирә-яҡ.
Был фамилияға ялғауҙы нисек ҡушырға? Ишбирҙинде – Ишбирҙинды.
Рус телендәге -ев, -ин формалары менән яһалған башҡорт фамилияларына, нигеҙе нәҙек булһа, нәҙек ялғау ҡушыла, тимәк, дөрөҫ яҙылышы: Ишбирҙинде.