Справка
Кешегә бирелгән ҡушамат ләҡап, ләҡәп, лаҡап варианттарында осрай. Нисек яҙырға?
Орфографик һүҙлектә был һүҙҙең ләҡәп яҙылышы теркәлгән. Ләкин лаҡап, ләҡап формалары ла ҡулланыла.
Васыятнама – васытнәмә – васыят-нама тигән һүҙҙең яҙылышы ҡыҙыҡ.
Һүҙ васыятнамә тип яҙыла.
Был һүҙ бер һүҙ итеп яҙыламы, ике һүҙ итепме? Боҙбармаҡ – боҙ бармаҡ?
Һүҙҙең дөрөҫ яҙылышы: боҙбармаҡ (“Башҡорт теленең академик һүҙлеге”, Өфө, 2011, 2-се том, 301-се бит).
Ихтирам менән ихтибар һүҙҙәре бер үк тамырҙан яһалғандармы?
Ике һүҙ ҙә – ғәрәп теленән үҙләштерелгән һүҙ: иғтибар اعتبار ; ихтирам احترام
Күренеүенсә, һүҙ эсендә ике төрлө тартынҡы ҡулланыла. Шуның өсөн һүҙҙәрҙең яҙылышы ла төрлөсә: ихтирам һәм иғтибар.
Почерк һүҙенең үҙгәрешен асыҡларға ярҙам итһәгеҙ ине. Пропуск – пропускыға кеүек үҙгәрәме?
Пропуск һүҙенең үҙгәреше түбәндәге ҡағиҙәгә буйһона: “Аҙағы -ск, -нг, -нк менән бөткән һүҙҙәргә ялғау ҡушҡанда, ике араға -ы- ҡуйып яҙыла: пропуск – пропускыға”.
Почерк һүҙенең үҙгәреше иһә орфогрфия һүҙлегендә түбәндәгесә бирелә: почерк (ис.) – почерктың, почеркка; почеркына (аҙағы ҡаты -к, -г менән бөткән сит телдәрҙән ингән һүҙҙәргә -к менән башланған төбәү килеш ялғауы ҡушыла).
Тәьҫир һүҙенең яҙылышын аңлатығыҙ әле. Ь билдәһе ниңә һуҙынҡынан һуң ҡуйыла ул?
Ҡағиҙәгә ярашлы, тауышты өҙөп, алдағы нәҙек тартынҡы йәки һуҙынҡы өндө айырып әйткәнде белдереү өсөн ь билдәһе ҡулланыла, мәҫәлән, көньяҡ, мәсьәлә, тәьмин, мөьмин. Тәьҫир һүҙе лә шул ҡағиҙәгә ҡарай.
Критерий һүҙен нисек үҙгәртергә ул: критерийһы? критерияһы? критерийы? Аңлашылмай.
Был һүҙ критерийы тип үҙгәртелә. Орфографик һүҙлектә һүҙҙең үҙгәреше түбәндәгесә бирелә: критерий (ис.) -ҙың, -ға; -ы(на).
Әҙәби телдә еңгәй тип ҡулланыламы?
Әҙәби телдә еңгә һүҙе теркәлгән, еңгәй – һөйләштәргә хас форма.
Минеңсә, түбәндәге һөйләмдә һүҙҙәр һыҙыҡса аша бирелмәй: Госпиталдән-госпиталгә күсеп йөрөп дауаланды (миҫал гәзиттән алынды). Дөрөҫмө?
Дөрөҫ билдәләгәнһегеҙ, һыҙыҡса кәрәкмәй, сөнки ике һүҙҙең һәр береһе үҙ мәғәнәһен һәм ике аралағы мәғәнә мөнәсәбәтен һаҡлаған.