Справка
Һуңғы йылдарҙа баҫмаларҙа бәйғәмбәр тип яҙа башланылар. Был һүҙҙе яҙыуҙың ҡағиҙәһе үҙгәрҙеме?
Юҡ, үҙгәрмәне. Орфография һүҙлегендә пәйғәмбәр һүҙе теркәлгән.
Тегенән, бынан тауыштар ишетелде. Был һөйләмдә өтөр артыҡ түгелме?
Был һөйләмдә һыҙыҡса ҡуйыу урынлыраҡ: Тегенән-бынан тауыштар ишетелде.
Халыҡ араһында йөрөгән изге кеше – Хызыр Ильяс. Ильяс, яңғыҙлыҡ исем булғас, һәр ваҡыт ҙур хәреф менән яҙыла, уныһы аңлашыла. Хызыр һүҙен дә гел ҙур хәрефтән яҙырғамы?
Ғәҙәттә, был исем Хызыр Ильяс тип ҙур хәрефтән яҙыла.
Харам һүҙе дөрөҫмө, хәрәмме?
Орфография һүҙлегендә хәрәм формаһы теркәлгән. Шулай ҙа аңлатмалы һүҙлектәрҙә ике форма ла бирелә.
Ырыу аҙна-ун көндән әйләнеп ҡайта. Һыҙыҡса кәрәкме ошо һөйләмдә?
Был һөйләмдә һыҙыҡса түгел, һыҙыҡ (тире) ҡуйылырға тейеш: Ырыу аҙна – ун көндән әйләнеп ҡайта.
Бер текста селтер шишмә тигән форма осраны. Был хаталы кеүек?
Ғәҙәттә, сылтыр шишмә формаһы ҡулланылыусан. Ләкин селтер оҡшатыу һүҙе лә бар.
Йырҙан алынған һүҙҙәр:
Үтәр микән ғүмерем янып көйөп,
Һүнәр микән бәғерем ялҡыны…
Дөрөҫ яҙылған тип алып буламы?
Әҙәби тел нормаларына ярашлы түбәндәгесә яҙылырға тейешле:
Үтерме икән ғүмерем янып-көйөп,
Һүнерме икән бәғерем ялҡыны…
Ләкин фольклор текстарында әйтелештәгесә яҙылыш та ҡулланыла.
Ә шулайҙа артабан китәләр. Хата бармы ошонда?
Контексҡа ҡарап, ике төрлө аңлап һәм яҙып була: 1. Ә шул айҙа артабан китәләр. 2. Ә шулай ҙа артабан китәләр. Мәғәнәһенә ҡарап яҙырға кәрәк.
“Кровопролитие” һүҙен нисек тәржемә итергә: ҡан ҡойош – ҡанҡойош?
Ҡушма һүҙҙең компоненттары айырым яҙыла: ҡан ҡойош.
Был дөрөҫ яҙылғанмы: яп-яңғыҙ йәшәй.
Орфография һүҙлегендә япа-яңғыҙ формаһы теркәлгән.