Справка
Мәғарифтең тип яҙыу дөрөҫмө?
Ғәрәп, фарсы телдәренән үҙләштерелгән һүҙҙәрҙең һуңғы ижеге -и- менән килеп, унан алдағы ижеге ҡалын булһа, ҡалын ялғау ҡушыла: мәғарифтың, мәғарифҡа, мәғарифта.
Ниндәй ялғау ҡушыла: РФ-ның йәки РФ-тың?
Дөрөҫ яҙылышы: РФ-тың, сөнки ҡыҫҡартылған һүҙҙәргә ялғау тулы әйтелешенә түгел, ҡыҫҡа әйтелешенә ҡарап ҡушыла.
Ҡайһы вариант ҡағиҙә буйынса дөрөҫ тип һанала: 1) артистҡа; 2) артисҡа?
Аҙағы —ст менән бөткән һүҙҙәргә ялғау ҡушылғанда, һуңғы -т төшөп ҡала: артист – артисҡа, текст – тексҡа.
Боролошты һүҙендә ялғау дөрөҫ ҡушылғанмы?
Дөрөҫ яҙылышы: боролошто, сөнки беренсе ижектәрендә о йәки ө хәрефтәре булған төп башҡорт һүҙҙәренең башҡа ижектәрендә а, ә, у, ү, и хәрефтәренең береһе килмәһә, бөтә ижектәрендә лә о йәки ө яҙылышы һаҡлана: боролошто, төҙөлөштө, тормошоноң, көсөнөң. Әгәр ҙә бындай һүҙҙәрҙең ҡалған ижектәрендә а, ә, у, ү, и һуҙынҡыларының береһе килһә, уларҙың һуңғы ижектәрендә ы, е хәрефтәре яҙыла: көлөүе, ҡороуы, өлөшөндәге, болондағы, мөмкинлек.