Справка
Ҡушма һүҙҙәрҙең бер өлөшө булып ҡулланылған намә һүҙе дөрөҫмө, нәмә һүҙеме, нама һүҙеме?
Бындай һүҙҙәрҙә намә һүҙе ҡулланыла: йондоҙнамә, ғаризнамә, шаһитнамә.
Ҡушма һүҙҙәрҙә ампер— һүҙе килһә, ул нисек яҙыла?
Бындай һүҙҙәр рус теленән алынғанлыҡтан, яҙылыштары ла сығанаҡ телдәгесә һаҡлана: амперметр, микроампер, миллиампер, ампер-секунд, ампер-сәғәт, ампер-уралмалар, ампер-үлсәү.
Зооветучастка кеүек һүҙҙәрҙә ниңә участка тип яҙыла?
Сөнки башҡорт теленә был һүҙ участка рәүешендә ҡабул ителеп нығынған.
Автовеломотоуҙыш, зооветпункт кеүек һүҙҙәр дөрөҫ яҙылғанмы?
Һүҙҙәр дөрөҫ яҙылған.
Фармацевт һүҙен төбәү килешкә ҡуйғанда, һуңғы хәреф төшөп ҡаламы?
Эйе, ҡағиҙәгә ярашлы яҙылышы: фармацевҡа.
Һүҙлектәрҙә бәрат һүҙе лә бар, бәра’әт һүҙе лә. Ҡайһыһы дөрөҫ?
Ике яҙылыш та дөрөҫ тип ҡабул ителгән.
Пункт һүҙен эйәлек килешкә ҡуйғанда, һуңғы хәреф төшөп ҡаламы?
Юҡ, һаҡлана. Дөрөҫ яҙылышы: пункттың.
Ҡушма һүҙҙәрҙә вело— һүҙе килһә, ул нисек яҙыла?
Ҡушып яҙыла: велоспорт, велотур, велотрек.
Һүҙлектәрҙә гонаһ һүҙе лә бар, гөнаһ һүҙе лә. Ҡайһыһы дөрөҫ?
Ике яҙылыш та дөрөҫ тип ҡабул ителгән.