Справка
Мыяулау, сипелдәү кеүек ҡылымдар өноҡшатыу һүҙҙәрҙән яһалған. Мөңрәүҙе аңлатҡан мөө тигән һүҙҙән нисек ҡылым яһарға?
Был һүҙҙән мөьөлдәү ҡылымы яһала.
Мөмкинлек һүҙе бар. Мөмкинселек тип ҡулланыу дөрөҫмө?
Ике һүҙ ҙә әҙәби телдә ҡулланылыусан.
Ошоларҙың ҡайһыһы дөрөҫ һанала? Хаҡлымы, түгелме йәки хаҡлымы-түгелме.
Контексҡа ҡарап, икеһе лә яҙылырға мөмкин. Икенсе яҙылыш йышыраҡ ҡулланыла.
Орфографик һүҙлектәрҙә ошо һүҙ төрлөсә яҙылышта осраны: һүҙъяһалыш – һүҙьяһалыш. Дөрөҫө нисек?
Дөрөҫ яҙылышы: һүҙьяһалыш.
Хоббийың тип яҙырға яраймы?
Һүҙ дөрөҫ яҙылған. Ләкин яратҡан шөғөлөң тип алыу отошлораҡ.
Холҡһоҙ тигән һүҙ осраны. Шулай яҙыу дөрөҫ буламы?
Һүҙҙең дөрөҫ яҙылышы: холоҡһоҙ.
Ошоғаса башҡорттарҙың үҙҙәре өсөн генә хас ҡыҙыу холҡтарына һәм быуаттар буйынса нығынған, өйрәнелгән ғөрөф-ғәҙәттәренә тейешлесә иғтибар ителмәне. Я.Хамматов. Был һөйләмдәге холҡтарына һүҙе дөрөҫмө?
Дөрөҫ яҙылышы: холоҡтарына.