Справка
Үҙ аллы һүҙе айырып яҙыла. Үҙ һүҙле лә шулай яҙыламы?
Орфография ҡағиҙәһе буйынса, үҙ һүҙле айырып яҙыла. Унан яһалған үҙһүҙлелек ҡушып яҙыла.
Люфт һүҙен килештәр менән үҙгәрткәндә, һуңғы хәреф төшөп ҡаламы?
Юҡ, һаҡлана. Дөрөҫ яҙылышы: люфт, люфттың, люфтҡа, люфтты, люфтта, люфттан.
Окулист һүҙен төбәү килешкә ҡуйғанда, һуңғы хәреф төшөп ҡаламы?
Эйе, ҡағиҙәгә ярашлы яҙылышы: окулисҡа.
Киләлмәне, табалманы тип яҙып буламы?
Был формалар һөйләү телмәренә хас. Яҙмала килә алманы, таба алманы рәүешендә яҙылырға тейеш.
Ҡушма һүҙҙәр ара тигән һүҙ менән килгәндә, улар нисек яҙылырға тейеш?
Бер өлөшө ара һүҙенән килһә, ҡушма һүҙҙәрҙең компоненттары һыҙыҡса аша яҙыла: милләт-ара, мәктәп-ара, төбәк-ара, халыҡ-ара.
Алтынай Юнысованың “Йоморо-йоморо йомғағым” тигән клибы билдәле. Минеңсә, бында йоморо һүҙ йомро булырға тейеш ине.
Эйе, һүҙҙең дөрөҫ яҙылышы: йомро.
Радио һүҙе менән бик күп яңы һүҙҙәр яһалған: радиожурнал, радиобәйләнеш, радиокомитет, радиокүпер, радиомонтаж, радиосистема һ.б. Улар бөтәһе лә ҡушып, һыҙыҡса ҡуймай яҙыламы?
Дөрөҫ, радио һүҙе менән яһалған ҡушма һүҙҙәр, әгәр икенсе компоненты эйәлек ялғауы алмаһа, һәр ваҡыт ҡушып яҙыла.
Ошо һүҙ төрлөсә яҙылышта осраны: меңъяпраҡ – меңьяпраҡ. Дөрөҫө нисек?
Дөрөҫ яҙылышы: меңьяпраҡ.