Справка
Ҡапылғара аңлай алмай торҙо. Ҡапылғара һүҙе әҙәби телдекеме?
Был рәүеш орфографик һүҙлектә ҡапыл-ҡара формаһында теркәлгән.
Һаумыһығыҙ! Хатты илай, илай уҡыным. Һөйләмдә өтөр шулай ҡуйыла аламы?
Ҡабатланған һүҙҙәр һыҙыҡса аша яҙыла. Һөйләмдең түбәндәге яҙылышы отошлораҡ: Хатты илай-илай уҡыным.
Һәр ҡайһы кеше тип әйтеү дөрөҫмө?
Был осраҡта һәр бер кеше тип әйтеү дөрөҫөрәк. Һәр ҡайһы формаһы рус телендәге каждый һүҙен тәржемә итергә тырышыу һөҙөмтәһендә барлыҡҡа килгән булһа кәрәк. Контексҡа ҡарап, әҙәби телдә һәр ҡайһыһы формаһы ҡулланылыусан.
Баҡсалағы сәскәләрҙең ҡайныһы матурыраҡ? Ошонда хата бармы?
Һөйләмдәге ҡайныһы һорау алмашы әҙәби телдә йышыраҡ ҡайһыһы формаһында ҡулланыла. Килтерелгән һөйләмде түбәндәгесә яҙыу отошлораҡ: Баҡсалағы сәскәләрҙең ҡайһыһы матурыраҡ?
Мағариф системаһы тип һөйләйҙәр. Ниңә яҙылышҡа тура килмәй?
Мәғариф – ғәрәп теленән үҙләштерелгән һүҙ, график принципҡа ярашлы нигеҙ телдәгесә яҙыла.
Өфө-Адлер рейсы тип яҙыу хаталы түгелме?
Ике сик араһын белдергән һүҙҙәр һыҙыҡ аша яҙыла; тексты компьютерҙа баҫҡанда, һыҙыҡ ике яҡтан буш урын (пробел) менән айырыла: Өфө – Адлер рейсы.
Күренекле башҡорт композиторы Заһир Исмәғилевтең әҫәрҙәре. Фамилиялағы ялғау дөрөҫ яҙылғанмы?
Дөрөҫ яҙылған. Ҡағиҙәгә ярашлы, рус телендәге -ев, -ин формалары менән яһалған башҡорт фамилияларына, нигеҙе нәҙек булһа, нәҙек ялғау ҡушыла.
Тәүәкәл – тәүүәкәл – тәүәккәл: ниндәй яҙылышын ҡулланырға? Текстарҙа бөтәһен дә осратҡаным бар.
Был үҙләштерелгән һүҙҙең әҙәби телдәге дөрөҫ яҙылышы тәүәккәл.
Орфография һүҙлегендә аяҡ өҫтө формаһы ғына бар. Текстарҙа аяғөҫтө бик йыш осрай. Бындай яҙылыш хаталы буламы?
Аяғөҫтө һүҙе “Башҡорт теленең академик һүҙлеге”нең 1-се томында (Өфө, 2011, 404-се бит) теркәлгән.
Һаумыһығыҙ! Мәхшәр менән мәшхәр араһында ниндәй айырма бар ул?
Әҙәби телдә һүҙҙең бер генә варианты бар, дөрөҫ яҙылышы: мәхшәр.