Справка
Ошоларҙан ҡайһы вариант дөрөҫ тип иҫәпләнелә: таҫыллыҡ, таһыллыҡ?
Әҙәби телдә таһыллыҡ варианты нығынған.
Ҡайһы бер һүҙҙәрҙең яҙылышы аңлашылмай. Мәҫәлән, әхлаҡ тип яҙырға ҡуша орфографик һүҙлек. Ләкин әйтелештә әхләҡ тип әйтә бар кеше. Ниңә шулай алынған икән?
Башҡорт теленә ғәрәп һүҙҙәре бик боронғо дәүерҙә килеп ингән. Телдең яйлап үҙгәрә барыуы һөҙөмтәһендә үҙләштерелгән һүҙҙәрҙең әйтелеше лә үҙгәрергә мөмкин. Ләкин орфографик ҡағиҙәләр теге йәки был һүҙҙең яҙылышын ҡалыплаштыра, шуға күрә әхлаҡ һүҙен дә ошо нормаға һалынған формала яҙырға тейешбеҙ.
Ошо һүҙҙе төрлөсә яҙып ҡуялар: ниһәйәт – ниһайәт. Ҡағиҙәһе бармы уның?
Был үҙләштерелгән һүҙҙең дөрөҫ яҙылышы: ниһайәт.
Һаумыһығыҙ! Бер берһенә ҡарап торалар. Ошо дөрөҫ яҙылдмы?
Дөрөҫ яҙылышы: Бер-береһенә ҡарап торалар.
Кемдер тирбәлеү, кемдер тибрәлеү тип яҙа. Шуларҙың ҡайһыһы әҙәби телдә дөрөҫ икән?
Әҙәби телдә тирбәлеү һүҙе ҡулланыла. Тибрәлеү варианты диалекттарҙа осрай.
3-өнсө бүлек, 3-нсө бүлек, 3-сө бүлек – ҡайһы яҙылыш дөрөҫ тип иҫәпләнелә?
Дөрөҫ яҙылышы: 3-сө бүлек.
Социаль селтәрҙәрҙә 2020-се йыл, 1970-се йыл тип яҙғандарын күрәм. Йылды белдергән һандарға ялғау ҡушыламы?
Орфография ҡағиҙәләре буйынса, датаны белдергән ғәрәп цифрҙарынан һуң рәт һанын белдергән ялғау яҙылмай: 2020 йыл, 1970 йыл.