Справка
Ауыҙын асһа үпкәһе күренә тип яҙғанда өтөр кәрәкме?
Был һөйләмдә өтөр ҡуйыла: Ауыҙын асһа, үпкәһе күренә.
Ауыҙын асһа үпкәһе күренә тип яҙғанда өтөр кәрәкме?
Был һөйләмдә өтөр ҡуйыла: Ауыҙын асһа, үпкәһе күренә.
Саңғы шыуала көн буйы, кискә генә ҡайта. Бындай берәй яңғылышлыҡ бар мени?
Дөрөҫ яҙылышы: Саңғы шыуа ла көн буйы кискә генә ҡайта.
Нисек дөрөҫөрәк була:
контекстҡа ҡарап – контексҡа ҡарап?
Дөрөҫ яҙылышы: контексҡа ҡарап, сөнки аҙағында -сть, -ст, -фт, -зд торған һүҙҙәргә ялғау ҡушҡанда, һуңғы -т, -ть, -д төшөп ҡала.
Ағза-мөхбир тигән термин бармы ул?
[Рәсәй фәндәр академияһының] мөхбир ағзаһы тип ҡулланыла.
Был һүҙҙе әйтеүҙән һис ялыҡмайым. Ошонда ы хәрефе артыҡмы?
Дөрөҫ, ы хәрефе артыҡ. Дөрөҫ яҙылышы: Был һүҙҙе әйтеүҙән һис ялҡмайым.
Танк – танкылар, пропуск – пропускыға тип яҙылғас, факт – фактылар, пункт – пунктылар, проект –проектылар тип яҙылырға тейеш түгелме ни?
Аҙағы тик -ск, -нг, -нк менән бөткән һүҙҙәргә ялғау ҡушҡанда, ике араға -ы-ҡуйып яҙыла: отпуск – отпускыла, лозунг – лозунгылар, банк – банкыһы. Ҡалған осраҡтарҙа дөйөм ҡағиҙә ҡулланыла: факт – факттар, пункт – пункттар, проект –проекттар һ. б.
Халыҡ-ара әхләклелек көнө билдәләнә. Бында хата бармы?
Дөрөҫ яҙылышы: Халыҡ-ара әхлаҡлылыҡ көнө билдәләнә.