Справка
Известь, извёстка һүҙҙәрен башҡортса нисек дөрөҫ итеп яҙырға?
Башҡортса дөрөҫ яҙылышы: эзбиз.
Был һүҙҙе матбуғат биттәрендә ике төрлө яҙалар: мөҡҡәдәс, мөҡәддәс. Ҡайһыһы орфография яғынан дөрөҫ һанала?
Дөрөҫ яҙылышы: мөҡәддәс.
Ниндәй һүҙҙәр хатаһыҙ яҙылған: тасури уҡыу, тасуири уҡыу.
Дөрөҫ яҙылышы: тасуири уҡыу.
Ҡайһы һүҙҙең яҙылышы әҙәби телгә тап килә: тәпсирләү, тәфсирләү?
Әҙәби телдә ике вариант та ҡулланыла.
Нефтекамск ҡалаһы башҡортса шулай уҡ ҡаламы?
Башҡортса Нефтекама ҡалаһы тип яҙыла.
Юғийһә онотоуың бар. Килтерелгән миҫалдағы юғийһә һүҙенең яҙылышы ҡыҙыҡһындыра.
Дөрөҫ яҙылышы: юғиһә.
Социаль селтәрҙәрҙә, хатта әҙәби әҫәрҙәрҙә лә өлөкөгөн тигән һүҙҙе осратҡаным бар. Былай яҙылырға тейеш түгелдер. Мин дөрөҫ уйлайыммы?
Һүҙҙең әҙәби телдә дөрөҫ яҙылышы: элекке көн. Өлөкөгөн варианты диалекттарҙа ҡулланыла.
Ялғау дөрөҫ ҡушылған һүҙҙе күрһәтегеҙ әле: зауҡына, зауығына.
Дөрөҫ яҙылышы: зауығына.
Планетарийға, планетариға – ошо һүҙҙәрҙең ҡайһыһын хатаһыҙ тип һанарға?
Дөрөҫ яҙылышы: планетарийға. Тамырҙағы й хәрефе ялғау ҡушҡанда һаҡлана.