Справка
Нисек яҙылһа, дөрөҫ һанала: бөҙрә йәки бөҙөрә?
Дөрөҫ яҙылышы: бөҙрә (33-сө һорауҙы ҡарағыҙ).
Халыҡ телендә һерәңләү тигән һүҙ бар. Ошо һүҙ ниндәй хәреф н йәки ң менән яҙыламы?
Дөрөҫ яҙылышы: һерәнләү.
Һүҙҙәр дөрөҫ яҙылғанмы: ғәжәеп, тәғәен.
Һүҙҙәр хаталы яҙылған. Дөрөҫ яҙылыштары: ғәжәйеп, тәғәйен.
Уҡыусылар тарафынан төшөрөлгән һүрәттәр тигән һөйләмде нисек ыҡсым ғына һәм хатаһыҙ итеп яҙырға икән?
Дөрөҫ яҙылышы: уҡыусылар төшөргән һүрәттәр.
Халыҡ телендә элмәңләү тигән һүҙ бар. Ошо һүҙ әҙәби телгә ингәнме, ул нисек яҙыла, н йәки ң хәрефе менәнме?
Эйе, был һүҙ әҙәби телгә ингән, һүҙлектәргә алынған, орфографик һүҙлектәге яҙылышы: элмәнләү.
Ҡөтдәһенә сыҡты, ҡөддәһенә сыҡты. Ике һүҙбәйләнештең ҡайһыһын яҙылыш буйынса дөрөҫ тип әйтергә була?
Дөрөҫ яҙылышы: ҡөддәһенә сыҡты.
Телдә менюҙы йәки менюны тип тә әйтәләр. Нисек яҙыла?
Дөрөҫ яҙылышы: менюҙы, менюҙан. Аҙағы —и, -у, -ю(у) менән бөткән сит һүҙҙәргә, һуңғы өн һуҙынҡы итеп түгел, дифтонгылаштырып әйтелгән өсөн,
—ҙ менән башланған ялғау ҡушыла.
Мигрень һүҙенә ниндәй ялғау ҡушыла: нәҙекме, ҡалынмы?
Дөрөҫ яҙылышы: мигренгә, мигрендән. Аҙағы –ль, -нь менән килһә йәки ике тартынҡы менән бөтөп, һуңғыһы йомшаҡ булһа, нәҙек ялғау ҡушыла.
Килемде үҫтереү һүҙбәйләнеше интернет киңлектәрендә йыш күҙгә ташлана. Был һүҙбәйләнештә үҫтереү һүҙен ҡулланыу дөрөҫмө? Гөл үҫә, сәс үҫә, балалар үҫә, ә килем үҫә аламы икән?
Был һүҙбәйләнештә үҫтереү урынына арттырыу, күбәйтеү һүҙҙәрен ҡулланыу урынлы булыр ине: килемде арттырыу, килемде күбәйтеү.