Справка
Һүҙҙең дөрөҫ яҙылышын белергә ине: ҡушҡуллап, ҡуш ҡуллап, ҡуш-ҡуллап.
Дөрөҫ яҙылышы: ҡуш ҡуллап.
Башҡорт ҡатын-ҡыҙҙарының биҙәүесе иңһәлекте төрлөсә әйтәләр һәм яҙалар, мәҫәлән: инһалыҡ, инһәлек, иңһәлек һ.б. Ошо биҙәүес атамаһы нисек дөрөҫ яҙыла икән?
Дөрөҫ яҙылышы: иңһәлек.
Һалынҡы һүҙе нисек яҙыла, н йәки ң хәрефе менәнме?
Дөрөҫ яҙылышы: һалынҡы, -н өнөнә бөткән нигеҙҙән —ге / -ғы, -ке / -ҡы ялғауҙары менән яһалған һүҙ булһа, -н менән яҙыла.
Мазь һүҙенә ниндәй, ҡалын йәки нәҙек ялғау ҡушыла?
Р.Ғ. Аҙнағолов төҙөгән “Башҡорт теленең орфография һүҙлеге”ндә (Өфө: Китап, 1998, 171-се бит) был һүҙ ҡалын ялғау менән теркәлгән: мазь, маздың, мазға, маздан; мазы(на). 2002 йылда Н.Ф. Суфьянова һәм З.К. Ишмөхәмәтов тарафынан әҙерләнеп нәшер ителгән орфография һүҙлегенә был һүҙ индерелмәгән. Текстарҙа ла һүҙ тик төп килештә, мазь формаһында ҡулланылыусан, башҡа осраҡтарҙа май һүҙе менән алыштырылып килә: ихтиол майы, күҙ майы.
Тюль һүҙенә ниндәй ялғау ҡушыла, нәҙекме, ҡалынмы?
Аҙағы —ль, -нь менән килһә йәки ике тартынҡы менән бөтөп, һуңғыһы йомшаҡ булһа, нәҙек ялғау ҡушыла: тюлгә, тюлде.
Сәңгеү һүҙе нисек дөрөҫ яҙыла? н йәки ң хәрефе менәнме?
Өн нигеҙ һүҙҙең эсендә булһа, һүҙ -ң менән яҙыла: сәңгеү.
Асыҡ һауа аҫтындағы тамаша, тәнҡит күҙлеге аша ҡарарға һүҙбәйләнештәрен аҫтында, аша һүҙҙәрен ҡулланмайса нисек дөрөҫ яҙырға?
Дөрөҫ яҙылышы: асыҡ һауалағы тамаша, тәнҡит күҙлегенән ҡарарға.
Фойе һүҙенә ниндәй, ҡалынмы, нәҙекме ялғау ҡушыла?
Һуҙынҡы, ҡаты тартынҡы йәки —й менән бөткән рус һәм сит тел һүҙҙәренә ҡалын ялғау ҡушыла: фойеның, фойеға, фойеһы.
Фиҙәҡәр, фиҙаҡәр тип яҙған осраҡтар бар. Һүҙҙең дөрөҫ яҙылышы нисек?
Дөрөҫ яҙылышы: фиҙаҡәр (65-се һорауҙы ҡарағыҙ).
Хәҙерге көндә иңбаш тип тә, инбаш тип тә әйтәләр. Дөрөҫ яҙылышы нисек?
Дөрөҫ яҙылышы: иңбаш.