Справка
Һаумыһығыҙ! Ошо һүҙҙәр дөрөҫмө? Вәғәҙә бирҙемдәһә?
Ҡағиҙә буйынса, көсәйтеү, раҫлау киҫәксәһенең тулы формаһында һәр компонент үҙенә башҡа айырым яҙыла, шуның өсөн дөрөҫ яҙылыш: вәғәҙә бирҙем дәһә.
Хәйерле көн! Дөрөҫө нисек була ул: жюрила, жюрилә, жюриҙа, жюриҙә?
Был һүҙ жюриҙа тип яҙыла, сөнки һуҙынҡы менән бөткән рус һәм сит тел һүҙҙәренә ҡалын ялғау ҡушыла.
Почему в сложных словах гөлйемеш, Баййегет пишется й как разделительный?
Согласно действующим правилам башкирской орфографии, если второй компонент сложного слова начинается на букву е, то перед ним ставится согласная й, которая не допускает прочтение слова в виде [гөлемеш, Байегет].
Йәбер, золом синонимы?
Һорауҙы дөрөҫ аңлаһаҡ, һүҙ йәбер менән золом һүҙҙәренең үҙ-ара синоним булыуы тураһында бара. «Башҡортса-русса синонимдар һүҙлеге»ндә (төҙөүсеһе – Усманова М.Ғ., Өфө, 2011, 70-се бит) золом, йәбер, шулай уҡ рәнйетеү, ғазап, яфа һүҙҙәре синонимдар рәтендә күрһәтелгән. Шулай уҡ йәбер-золом парлы һүҙ булараҡ ҡулланыла.
Хөрмәтле вә / үә ғиззәтле дуҫтарым! Ошо һөйләмдә вә ҡулланыла микән, үә һүҙеме? Орфография буйынса дөрөҫө нисек?
Орфография һүҙлегендә вә формаһы теркәлгән.
Икәүҙән икәү – һыҙыҡса аша яҙыламы, айырыммы?
Һүҙ һыҙыҡса аша яҙыла: икәүҙән-икәү.
Мәктәптең уҡытыу-тәрбиә эше буйынса директор урынбаҫары – Мәктәп директорының уҡытыу-тәрбиә эше буйынса урынбаҫары. Ҡайһыһы дөрөҫөрәк һанала?
Дөрөҫ яҙылышы: мәктәп директорының уҡытыу-тәрбиә эше буйынса урынбаҫары.
Һөйләшкәндә соңҡа йәки суңҡа тип тә әйтәләр. Ҡайһылай дөрөҫ?
Дөрөҫ яҙылышы: соңҡа (257-се һорауҙы ҡарағыҙ).
Шулайт, былайт тип яҙыу һәм һөйләү ғәҙәткә инде. Уларҙың дөрөҫ яҙылышы ла шулай була аламы?
Дөрөҫ яҙылышы: шулай ит, былай ит.
Миннекме, әллә миндекме? Әҙәби телгә ҡайһы варианты алынған?
Әҙәби телдә миндек нығынған.