Справка
Ҡатын-ҡыҙ исеменең дөрөҫ яҙылышы ҡыҙыҡһындыра. Ҡайһы варианты дөрөҫ: Гөльямал йәки Гөлъямал?
Был исем Гөльямал тип яҙыла.
Хәйерле көн. Ауылдың исеме ҡушып яҙыламы, әллә һыҙыҡса ашамы: Ләмәҙтамаҡ / Ләмәҙ-тамаҡ? Руссаһы – Лемез-тамак.
“Башҡортостан Республикаһының топонимдар һүҙлеге”ндә (Өфө, 2002) Ләмәҙтамаҡ формаһы теркәлгән. (143-сө бит).
Белорет районына ингән (русса исеме – Азикеево) ауылдың дөрөҫ яҙылышын яҙығыҙ әле. Интернетта ике варианты ла ҡулланыла: Әзекәй, Әҙекәй. Ҡайһыһы дөрөҫ?
“Башҡортостан Республикаһының топонимдар һүҙлеге”ндә (Өфө, 2002) Әзекәй формаһы теркәлгән. (230-сы бит).
Хәйерле көн. Бер исемдең дөрөҫ яҙылышы ҡыҙыҡһындыра. Исемдең ҡайһы варианты дөрөҫ: Аҡйегет / Аҡъегет?
Дөрөҫ яҙылышы: Аҡйегет.
Быуаттарҙан-быуаттарға бер-береһенә тапшырыу тигәндә ике осраҡта ла һыҙыҡса ҡуйыламы?
Һыҙыҡса бер-береһенә тигәндә генә ҡуйыла.
Имән ҡайырыһы файҙаһы, имән ҡайырыһынан һыу төнәтмәһе, 2 ҡалаҡ ваҡланған ҡайыры тигәндә ҡайыры дөрөҫ яҙылғанмы?
Әҙәби телдә ҡайыр һүҙе норма итеп алынған. Шуға күрә имән ҡайыры тип яҙыу дөрөҫ була. Бынан тыш, һыу төнәтмәһе тигәндә һыу һүҙе артыҡ, сөнки төнәтмә һыу менән әҙерләнгәне мәғлүм.
Исмәғилевты иҫкә алып. Был һөйләм дөрөҫ яҙылғанмы?
Рус телендәге -ев, -ин формалары менән яһалған башҡорт фамилияларына, нигеҙе нәҙек булһа, нәҙек ялғау, нигеҙе ҡалын булһа, ҡалын ялғау ҡушыла: Исмәғилевте.