ҘУР ХӘРЕФТӘР ЯҘЫЛЫШЫ
Ҙур хәреф менән башлап яҙыла:
- Һөйләм башындағы һүҙҙәр.
- Яңғыҙлыҡ исемдәр һәм ҡушаматтар: Өфө, Урал, Рәшит Ниғмәти, Мамин-Сибиряк, Аҡъял батыр; Юпитер, Галактика; Аҡтырнаҡ, Ҡарағолаҡ һ. б.
Иҫкәрмә: Ҡояш, ер, ай һүҙҙәре күк есеме булараҡ атап әйтелгәндә ҙур хәреф менән, башҡа ваҡытта бәләкәй хәреф менән яҙыла: Ерҙең барлыҡҡа килеүе, Ҡояштағы таптар, ләкин ҡояш сыҡты, ер йәшәрҙе.
- Төрлө ойошма һәм предприятиеларҙың бер нисә һүҙҙән торған атамаһындағы тәүге һүҙ: Башҡорт АССР-ы Ауыл хужалығы министрлығы, Тарих, тел һәм әҙәбиәт институты, Башҡорт дәүләт академия драма театры, Башҡорт дәүләт медицина институты, Өфө макарон фабрикаһы һ. б.
Иҫкәрмә: Бер нисә һүҙҙән яһалған иң юғары партия, профсоюз һәм дәүләт органдарының, иң мөһим халыҡ-ара ойошмаларҙың, шулай уҡ ил-дәүләттәрҙең ҡатмарлы атамаһындағы һәр атама һүҙ ҙур хәреф менән башлап яҙыла: Советтар Союзы Коммунистар партияһының Үҙәк Комитеты, КПСС-тың Башҡортостан Өлкә Комитеты, СССР Верховный Советы, Совет Армияһы, Совет Социалистик Республикалар Союзы, Башҡорт Автономиялы Совет Социалистик Республикаһы, Берләшкән Милләттәр Ойошмаһы һ. б.
- Илдәге юғары вазифа атамалары һәм хөрмәт исемдәре: Башҡорт АССР-ы Верховный Советы Президиумы Председателе, Советтар Союзы Геройы, Советтар Союзы Маршалы һ. б.
- Илдәге байрам, таныҡлы дата һәм мөһим ваҡиғаларҙы белдергән атамаларҙың тәүге һүҙе: Октябрь байрамы, Апрель конференцияһы, СССР Конституцияһы көнө, Яңы йыл байрамы һ. б.
Дата менән аталған байрам исемендәге число цифр менән бирелһә – ай исеме, һүҙ менән бирелһә – икеһе лә ҙур хәреф менән яҙыла: 1 Май байрамы – Беренсе Май байрамы.
Бер нисә һүҙҙең хәрефенән ҡыҫҡартып яһалған атамалар: КПСС, ВЛКСМ һ. б.