§7. О – о, Ө – ө

А.    О – о хәрефе ике өнгә билдә булып йөрөй:

а) төп башҡорт һүҙҙәрендә ҡалын һуҙынҡы ирен өнө булған о өнөнә: он, ос, оло, ҡолон, болон, һоло, ҡорос, боронғо, ҡоролош, ҡоролошо;

б) рус әҙәби теленән үҙләштерелгән һүҙҙәрҙәге ҡалын һуҙынкы о өнөнә: колхоз, завод, производство, пароход, агроном, трактор, доктор, мотор, фронт, совет, комсомол, кино, фото, район.

Б. Ө – ө хәрефе башҡорт һүҙҙәрендә нәҙек ижектәрҙә яҙыла: көн, төн, көндөҙ, көсөргәнеш, бөгөн, төтөн, Өфө, өлгө, төлкө, төрлө, өмөт, төҙөлөш.

В.   Беренсе ижектәрендә о йәки ө өндәре булған төп башҡорт һүҙҙәренең башҡа ижектәрендә а, ә, у, ү һәм и өндәренең береһе килмәһә, бөтә ижектәрендә лә о – ө яҙылышы һаҡлана: оҙон, оҙонлоғо, оҙонлоғоноң; төҙө, төҙөлөш, төҙөлөшөнөң.

Әгәр ҙә бындай һүҙҙәрҙең ҡалған ижектәрендә а, ә, у, ү, и өндәренең береһе килһә, уларҙың һуңғы ижектәрендә ы, е хәрефтәре яҙыла: тойоуы, ҡоралы, төҙөүе, мөмкинлек, һөжүме.